पद्मसम पादयुग्मरंगा । ओवाळणी होती भृंगा ।

नखमणी स्रवताहे गंगा । जे कां त्रिविधतापभंगा ।

वर्तुळ गुल्फ भ्राजमान । किंकिणीक्वणित नाद घणघणित । वाकीं वर झुणझुणित । नूपुरें झणण ध्वनी मंजिरीची ॥ १ ॥

आरती भुवनसुंदराची इंदिरावरा मुकुंदाची ॥ धृ. ॥

पीतपट हाटकतप्तवर्णी । कांची नितंबसुस्थानीं ।

नाभिची अगाध हो करणी । विश्वजनकाची जे जननी ।

त्रिवलीकलित उदरशोभा । कंबुगळां माळ विलंबित । झळाळ कौस्तुभ सरळ बाहु । श्रीवत्स तरळ मणि । मरळ कंकणाची प्रीति बहु जडित कंकणाची ॥ २ ॥

आरती भुवनसुंदराची इंदिरावरा मुकुंदाची ॥ धृ. ॥

इंदुसम आस्य कुंदरदना । अधरारुणाकंपबिंबवदना ।

पाहतां भ्रांति पडे मदना । सजलमेघ दैत्यदमना ।

झळकत मकरकुंडलाभा । कुटिल कुंतल मधुरपत्रावली । वेष्टिली टिळक भाळीं केशरी । झळाळीत कस्तुरीची । अक्षता काळी कस्तुरीची ॥ ३ ॥

आरती भुवनसुंदराची इंदिरावरा मुकुंदाची ॥ धृ. ॥

कल्पद्रुमातळीं मूर्ती । सौदामिनी कोटिदीप्ती ।

गोपीगोप वलयंभवती । त्रिविष्टप पुष्पवृष्टि करिती ।

मंजुळ मधुर मुरलिनादें । चकित गंधर्व चकित अप्सरा । सुर गिरिवर धरा कर्पूरारतीने । प्रेमयुक्त साची आरती ओवाळित साची ॥ ४ ॥

आरती भुवनसुंदराची इंदिरावरा मुकुंदाची ॥ धृ. ॥

वृंदावनिंचे विहरणी । सखे गे कृष्णमायबहिणी ।

श्रमलों भवाब्धिचे फिरणीं । आतां मज ठाव देई चरणीं ।

अहा हे पूर्ण पुण्यश्लोका । नमितों चरण शरण मी करुणा । येऊं दे विशालपाणी कृष्ण नेणतें बाळ । आपुलें राखि लाज याची ॥ ५ ॥

आरती भुवनसुंदराची इंदिरावरा मुकुंदाची ॥ धृ. ॥