जय देव जय देव जय साईनाथा । श्री सद्गुरुनाथा ।
विश्वंभरा विश्वेशा । तारक तू जगता ॥ जय देव ॥ धृ. ॥
ब्रह्मांडाचा नायक देवा तू कळले ।
प्रत्यय निजभक्तांचे अद्भुत दावियेले ।
ब्रह्मा विष्णु शङ्कर गणपती तू त्राता ।
भजतां तव पदकमला हरिसी भवचिंता ॥ १ ॥
जय देव जय देव जय साईनाथा ॥ धृ. ॥
हरूनी दारिद्र्याते रंका रक्षियले ।
रोगग्रस्तां तुझिया उदीने तारियले ।
वांझेसी तोषविलें देउनिया पुत्रा ।
जो जो वांछिल त्यांचा तू अससी दाता ॥ २ ॥
जय देव जय देव जय साईनाथा ॥ धृ. ॥
ज्ञानरवी तू दिधले ज्ञान अज्ञाना ।
सन्मार्गा लावुनिया उद्धरिले त्यांना ।
ऐशी तू सकलांची ममताळू माता ।
रोमांचित तनु होई गुण महिमा गातां ॥ ३ ॥
जय देव जय देव जय साईनाथा ॥ धृ. ॥
यमपाशा तोडुनी तू भक्त सोडविले ।
आयुर्बल देऊनि त्या सकला तोषविले ।
ऐसे सामर्थ्याचे प्रताप तव गातां ।
शिणली मति मग आलों शरण तुला नाथा ॥ ४ ॥
जय देव जय देव जय साईनाथा ॥ धृ. ॥
मद्वचनी विश्वासुनि जे सेवा करिती ।
त्यांची चिंता लागे रात्रंदिन मजसी ।
ऐसे दृढ आश्वासन दिधलेसी जगता ।
करुणेचा सागर तू अससी गुरुनाथा ॥ ५ ॥
जय देव जय देव जय साईनाथा ॥ धृ. ॥
समतेची योगाची मूर्ती श्री साई ।
ऋद्धिसिद्धी घेती लोळण तव पायीं ।
अंतर साक्षी तुजला सर्वांची वार्ता ।
अगम्य तुजला कांहीं ऐसा तू ज्ञाता ॥ ६ ॥
जय देव जय देव जय साईनाथा ॥ धृ. ॥
लाभे फळ करितां तव नवस समाधीला ।
दाखविसी अद्यापी निज अगाध लीला ।
चुकतां पथ दर्शविसी देउनि दृष्टांता ।
हीना दीनांचा तू स्वामी हितकर्ता ॥ ७ ॥
जय देव जय देव जय साईनाथा ॥ धृ. ॥
जन्मोजन्मी मजला घडुं दे श्रीदेवा ।
आशीर्वचनाची तव लाभो मज सेवा ।
घालुनिया लोटांगण याचितसे नाथा ।
पापात्मा मी यास्तव लोटूं नका परता ॥ ८ ॥
जय देव जय देव जय साईनाथा ॥ धृ. ॥