आरती रामदासा । भक्त विरक्त ईशा ।
उगवला ज्ञानसूर्य । उजळोनी प्रकाशा ॥ धृ. ॥
साक्षात् शंकराचा । अवतार मारुती ।
कलिमाजीं तेचि जाली । रामदासाची मूर्ती ॥ १ ॥
आरती रामदासा । भक्त विरक्त ईशा ॥ धृ. ॥
वीसही दशकांचा । दासबोध ग्रंथ केला ।
जडजीवां उद्धरीले । नृप शिवासी तारिले ॥ २ ॥
आरती रामदासा । भक्त विरक्त ईशा ॥ धृ. ॥
ब्रह्मचर्य व्रत ज्याचें । रामरूप सृष्टि पाहे ।
कल्याण तिन्हीं लोकीं । समर्थ सद्गुरुपाय ॥ ३ ॥
आरती रामदासा । भक्त विरक्त ईशा ॥ धृ. ॥