प्रपंचरचना सर्वहि भोगूनि त्यागिली ।
अनुतापाचे ज्वाळी देहबुद्धि हरविली ।
वैराग्याची निष्ठा प्रगटुनि दाखविली ।
अहंममता दवडुनि निजशान्ती वरीली ॥ १ ॥
जय जयाजी सद्गुरु तुकया दातारा ।
तारक तू सकळांचा जिवलग सोयरा ॥ धृ. ॥
हरिभक्तीचा महिमा विशेष वाढविला ।
विरक्त ज्ञानाचा ठेवा उघडुनि दाखविला ।
जगदुद्धारालागीं उपाय सुचविला ।
निंदक दुर्जनाचा संदेह निरसीला ॥ २ ॥
जय जयाजी सद्गुरु तुकया दातारा ॥ धृ. ॥
तेरा दिवस वह्या रक्षुनियां उदकीं ।
कोरड्याचि काढुनि दाखविल्या शेखी ।
अपार कविताशक्ति मिळवुनि इहलोकीं ।
कीर्तन श्रवणें तुमच्या उद्धरति जन लोकीं ॥ ३ ॥
जय जयाजी सद्गुरु तुकया दातारा ॥ धृ. ॥
बाळवे घेऊनि श्रीहरी भेटला ।
विधि जनिता तोचि आठव हा दीधला ।
तेणें ब्रह्मानन्दे प्रेमा डोलविला ।
न तुके म्हणोनि तुका नामीं गौरविला ॥ ४ ॥
जय जयाजी सद्गुरु तुकया दातारा ॥ धृ. ॥
प्रयाणकाळीं देवें विमान पाठविलें ।
कळिच्या काळामध्ये अद्भुत वर्तविलें ।
मानव देह घेऊनि निजधामा गेले ।
निळा म्हणे सकळ संत तोषविले ॥ ५ ॥
जय जयाजी सद्गुरु तुकया दातारा ॥ धृ. ॥