जटाधरं पाण्डुरङ्गं शूलहस्तं कृपानिधिम् ।
सर्वरोगहरं देवं दत्तात्रेयमहं भजे ॥
जगदुत्पत्तिकर्त्रे च स्थितिसंहार हेतवे ।
भवपाशविमुक्ताय दत्तात्रेय नमोऽस्तुते ॥ १ ॥
जराजन्मविनाशाय देहशुद्धिकराय च ।
दिगम्बराय दिव्याय दत्तात्रेय नमोऽस्तुते ॥ २ ॥
कर्पूरकान्तिदेहाय ब्रह्ममूर्तिधराय च ।
वेदशास्त्रपरिज्ञाय दत्तात्रेय नमोऽस्तुते ॥ ३ ॥
ह्रस्वदीर्घकृशस्थूल-नामगोत्र-विवर्जित ।
सर्वसर्वज्ञरूपाय दत्तात्रेय नमोऽस्तुते ॥ ४ ॥
यज्ञभोक्त्रे च यज्ञाय यज्ञरूपधराय च ।
यज्ञप्रियाय सिद्धाय दत्तात्रेय नमोऽस्तुते ॥ ५ ॥
भस्मोद्धूलितदेहाय महावीर्यधराय च ।
समलोष्ट्रहिरण्याय दत्तात्रेय नमोऽस्तुते ॥ ६ ॥
सर्वदुःखक्षयकराय सर्वकामप्रदायिने ।
सर्वकामनिषेव्याय दत्तात्रेय नमोऽस्तुते ॥ ७ ॥
अणिमादिगुणैश्वर्य-सर्वसिद्धिप्रदायिने ।
सच्चिदानन्दरूपाय दत्तात्रेय नमोऽस्तुते ॥ ८ ॥
इदं स्तोत्रं महद्दिव्यं दत्तस्य परमात्मनः ।
यः पठेत्प्रयतो नित्यं सर्वपापैः प्रमुच्यते ॥
सर्वसिद्धिं लभेन्मर्त्यो दत्तभक्तो न संशयः ॥