जय जय त्र्यंबकराज गिरिजानाथा गंगाधरा हो ।
त्रिशूल पाणी शांभो नीलग्रीवा शशिशेखरा हो ।
वृषभारुढ फणिभूषण दशभुज पंचानन शंकरा हो ।
विभूतिमाळाजटा सुंदर गजचर्मांबरधरा हो ॥ धृ. ॥
पडलें गोहत्येचें पातक गौतमऋषिच्या शिरी हो ।
त्याने तप मांडिले ध्याना आणि तुज अंतरी हो ।
प्रसन्न होऊनि त्यातें स्नाना दिधली गोदावरी हो ।
औदुंबरमुळी प्रगटे पावन त्रैलोक्यातें करी हो ॥ १ ॥
जय जय त्र्यंबकराज गिरिजानाथा गंगाधरा हो ॥ धृ. ॥
धन्य कुशार्वाताचा महिमा वाचे वर्णू किती हो ।
आणिकही बहुतीतें गंगाद्वारादिक पर्वती हो ।
वंदन मार्जन करिती त्याचे महादोष नासती हो ।
तुझिया दर्शनमात्रे प्राणी मुक्तीतें पावती हो ॥ २ ॥
जय जय त्र्यंबकराज गिरिजानाथा गंगाधरा हो ॥ धृ. ॥
ब्रह्मगिरींची भावें ज्याला प्रदक्षिणा जरी घडे हो ।
तें ते काया कष्टें जंव जंव चरणी रुपती खडे हो ।
तंव तंव पुण्य विशेष किल्मिष अवघें त्याचें झडे हो ।
केवळ तो शिवरूपी काळ त्याच्या पाया पडे हो ॥ ३ ॥
जय जय त्र्यंबकराज गिरिजानाथा गंगाधरा हो ॥ धृ. ॥
लावूनिया निजभजनी सकळही पुरविसी मनकामना हो ।
संतति संपत्ति देसी अंती चुकविसी यमयातना हो ।
शिव शिव नाम जपता वाटे आनंद माझ्या मना हो ।
गोसावीनंदन विसरे संसारयातना हो ॥ ४ ॥
जय जय त्र्यंबकराज गिरिजानाथा गंगाधरा हो ॥ धृ. ॥