लवथवती विक्राळा ब्रह्मांडी माळा ।
विषें कंठ काळा त्रिनेत्री ज्वाळा ।
लावण्य सुन्दर मस्तकी बाळा ।
तेथुनियां जळ निर्मळ वाहे झुळझुळा ॥ १ ॥
जय देव जय देव जय श्री शंकरा ।
आरती ओवाळू तुज कर्पूरगौरा ॥ धृ. ॥
कर्पूरगौरा भोळा नयनी विशाळा ।
अर्धांगी पार्वती सुमनांच्या माळा ।
विभूतीचे उधळण शितकंठ नीळा ।
ऐसा शंकर शोभे उमावेल्हाळा ॥ २ ॥
जय देव जय देव जय श्री शंकरा ॥ धृ. ॥
देवीं दैत्यीं सागरमंथन पै केले ।
त्यामाजी अवचित हलाहल जे उठले ।
तें त्वां असुरपणे प्राशन केले ।
नीळकंठ नाम प्रसिद्ध झाले ॥ ३ ॥
जय देव जय देव जय श्री शंकरा ॥ धृ. ॥
व्याघ्रांबर फणिवरधर सुंदर मदनारी ।
पंचानन मनमोहन मुनिजनसुखकारी ।
शतकोटींचे बीज वाचे उच्चारी ।
रघुकुळटिळक रामदासा अंतरी ॥ ४ ॥
जय देव जय देव जय श्री शंकरा ॥ धृ. ॥